Aalborg: Ríkisfundur og fundur í samstarvsráðnum

Í komandi viku fara Aksel V. Johannesen, løgmaður, Høgni Hoydal, landsstýrismaður í uttanríkis- og vinnumálum, Ruth Vang, landsstýriskvinna í fíggjarmálum og Bjarni Kárason Petersen, landsstýrismaður í lógarmálum til Danmarkar.

Mánadagin 26. august er ríkisfundur, og týsdagin 27. august er fundur í samstarvsráðnum.

Ríkisfundur í Aalborg

Londini skiftast um at vera vertir fyri fundunum, og við ársbyrjan tók Danmark yvir formansskapin frá Grønlandi. Ríkisfundurin hesa ferð verður hildin í Aalborg, heimstaði hjá Mette Frederiksen, forsætisráðharra.

Til ríkisfundin luttaka løgmaður, danski forsætisráðharrin, Mette Frederiksen, og grønlendski landsstýrisformaðurin, Múte B. Egede. Tey trý fara at umrøða samstarvið í ríkisfelagsskapinum og at kunna um búskaparligu og politisku gongdina í londunum.

Sum eg segði í ólavsøkurøðuni í ár, vilja vit í nógv størri mun umboða okkara egnu áhugamál úti í heimi og víðka rásarúmið á uttanríkispolitiska økinum. Allir flokkar eru samdir um, at Føroyar eiga at hava sjálvstøðugan limaskap í viðkomandi altjóða felagsskapum. Vit hava í nógv ár viðgjørt støðuna saman við donsku stjórnini, uttan nakað úrslit er komið burturúr. Mín vón er, at vit á fundinum í Aalborg nú kunnu koma víðari.

Aksel V. Johannesen, løgmaður

Fundur í samstarvsráðnum

Týsdagin 27. august verður fundur í samstarvsráðnum, har eisini landsstýrismaðurin í uttanríkis- og vinnumálum, landsstýriskvinnan í fíggjarmálum og landstýrismaðurin í lógarmálum luttaka saman við viðkomandi donskum og grønlendskum ráðharrum.

Á fundinum skulu londini umrøða uttanríkis- og trygdarpolitisku støðuna.

Tíðindafundur

Eftir fundin í samstarvsráðnum, verður almennum tíðindafundur, har løgmaður, danski forsætisráðharrin, Mette Frederiksen, og grønlendski landsstýrisformaðurin, Múte B. Egede, luttaka.

Tíðindafundurin byrjar kl. 13 føroyska tíð.

Fjølmiðlar ið ynskja at luttaka, skulu boða Statsministeriet frá við telduposti til presse@stm.dk

Hesi luttaka á fundinum í samstarvsráðnum

Føroyar

Aksel V. Johannesen, løgmaður
Høgni Hoydal, landsstýrismaður í uttanríkis- og vinnumálum
Ruth Vang, landsstýriskvinna í fíggjarmálum
Bjarni Kárason Petersen, landstýrismaður í lógarmálum

Danmark

Mette Frederiksen, forsætisráðharri
Lars Løkke Rasmussen, uttanríkisráðharri
Troels Lund Poulsen, verjumálaráðharri
Peter Hummelgaard, løgmálaráðharri

Grønland

Múte B. Egede, landsstýrisformaður
Vivian Motzfeldt, landsstýriskvinna í uttanríkis- og sjálvstýrismálum
Naaja H. Nathanielsen, landsstýriskvinna í vinnu-, ráðevnis-, lógar- og javnstøðumálum
Erik Jensen, landstýrismaður í fíggjarmálum