Sitandi samgonga millum Sambandsflokkin, Fólkaflokkin og Javnaðarflokkin hevur myndað landsins stjórn í nærum hálvt annað ár. Við lyklaorðunum altjóðagerð, sjálvbjargni og samhaldsfesti fór sitandi landsstýrið til verka at náa teimum málum, sum samgonguflokkarnir setti sær í samgonguskjalinum.
Løgmaður hevur saman við landsstýrinum gjørt ein avrikslista, ið lýsir mál, sum er rokkin. Endamálið er at geva fjølmiðlum og borgarum innlit í arbeiðið hjá landsstýrinum.
Landsstýrið hevur ítøkilig úrslit at vísa á á øllum málsøkjum. Úr rúgvuni kunnu nevnast heilsutrygd, semja um at skerja CO2-útlátið, ígildissetan av ST-sáttmálannum um rættindi teirra brekaðu, fult gjøgnumskygni í samband við fiskirættindi, tvílærararskipan sett í verk í 1. og 2. flokki, munandi broyting av ALS-skipanini og stuðul til fýra nýggj røktarheim.
Avrikslistin varð almannakunngjørdur á tíðindafundi á Gjáargarði, har landsstýrið hevur havt seminar.
Sí: Avrikslýsing