Fyrrapartin í dag vitjaði FIFA-forsetin Joseph S. Blatter í Tinganesi, har hann hitti løgmann, Kaj Leo Holm Johannesen. FIFA-forsetin er á vitjan í Føroyum í hesum døgum.
Løgmaður greiddi frá samfelagsviðurskiftum í Føroyum. Løgmaður vísti á, at fótbóltslandsliðið hevur ein týdningarmiklan leiklut í marknaðarføringini av Føroyum, og at FIFA-limaskapurin hevur havt stóran týdning fyri menningina av føroyskum fótbólti. Løgmaður nýtti eisini høvið til at takka FIFA fyri stuðulin , sum er latin føroyskum fótbólti, eitt nú til nýggja graslíkið á Tórsvølli.
Løgmaður greiddi eisini frá royndunum hjá Føroyum at fáa limaskap í Altjóða Olympisku Nevndini (IOC), so føroysk ítróttafólk kunnu umboða Føroyar á olympisku leikunum. Blatter situr í olympisku nevndini. Møguleikin fyri, at Føroyar kunnu fáa sonevndan viðurkendan limaskap varð umrøddur. Limaskapurin hevði merkt, at Føroyar høvdu kunnað luttikið undir egnum flaggi í olympisku leikunum. Blatter fer nú at kanna møguleikan hjá Føroyum at fáa tílíkan limaskap.