Semja um samstarv

 

Eftir ríkisfundin varð tíðindafundur við teimum trimum stjórnarleiðarunum hildin.

 

Fleiri mál av felags áhuga vórðu umrødd og viðgjørd, harímillum:

 

Løgmaður Kaj Leo Johannesen kunnaði um uppskotið til nýggja stórnarskipan, sum er til viðgerðar í Rættarnevndini. Grundleggjandi spurningar um partar av uppskotinum vórðu umrøddir. Løgmaður vísti á, at orðaskifti er millum politisku flokkarnar í Føroyum um uppskotið.  Løgmaður legði dent á, at neyðugt er við góðum dialogi um hetta týdningarmikla mál.

 

Løgmaður og danski forsætismálaráðharrin vóru samdir um, at ein nýggj stjórnarskipan skal virða grundlógina, heimastýrislógina og yvirtøkulógina.

Orðaskifti var um møguleikar fyri øktum samstarvi millum Føroyar og Danmark við atliti til ynski Føroya um tættari samstarv við ES. Frágreiðingin um Føroyar og ES varð í hesum sambandi umrødd. Løgmaður vísti á, at landsstýrið arbeiðir við at evna til ein nýggjan evropapolitikk og at stuðul frá donsku stjórnini er neyðugur fyri at náa einum tættari og gagnligari samstarvi við ES. Danski forsætismálaráðharrin vísti á, at danska stjórnini er sinnað at veita Føroyum sín fulla stuðul í arbeiðinum at fáa í lag betri avtalur við ES.

Løgmaður vísti á, at Føroyar ikki taka undir við ætlanini hjá donska stjórnini í Altjóða Hvalaveiðinevdini (IWC) um at atkvøða fyri uppskoti um at seta forboð fyri møguligari stórhvalaveiði. Eisini legði løgmaður dent á, at  IWC virkar fyri burðardyggari hvalaveiðu ístaðin fyri at verða ein friðingarfelagsskapur.     

 

Um ríkisfundir
Ríkisfundir eru árligir óformligir fundir millum stjórnarleiðararnar í ríkisfelagsskapinum. Fundirnir eru á skift millum tey trý londini. Endamálið er at kunna sínámillum um áleikandi viðurskifti og at tryggja góðan dialog og samstarv.