Løgmansembætið

Løgmansheitið er aldargamalt og hevur verið nýtt í Føroyum allar tíðir. Føroyska løgmansembætið stavar frá 13. øld, tá ið stóru rættarligu nýskipanirnar vóru í Noregi og í Føroyum.

Ovasti politiski - og fyrisitingarligi myndugleiki

Løgmansembætið fyri 1816 var nógv øðrvísi enn eftir 1948. Fyri 1816 stóð løgmaður á odda fyri dómstóli landsins, løgtinginum. Síðan 1948 hevur hann verið ovasti politiski- og fyrisitingarligi myndugleikin í Føroyum og hevur evsta útinnandi valdið á yvirtiknum málsøkjum.

Løgmaður staðfestir og kunnger uppskot til løgtingslógir, sum løgtingið hevur samtykt, og hevur í hesum sambandi eftirlit við, at samtyktirnar eru í samsvari við hægri lógarstig og millumtjóða sáttmálar.

Kann skriva út val

Løgmaður skrivar út val, áðrenn valskeiðið er runnið, og kann eisini skriva út val í úrtíð.

Løgmaður er samstundis stjórnarleiðari og hevur ábyrgd av at samskipa landsstýrisins arbeiði. Løgmaður tilnevnir landsstýrismenn, hevur eftirlit við, at landsstýrismenn umsita øki síni á lógligan og fullgóðan hátt, og kann loysa teir úr embætinum.

Niðanfyri er eitt yvirlit yvir Føroya løgmenn. Tó verður víst á, at óvissur eru í tíðini upp til 1531.

Føroya løgmenn:

Í heimastýristíðini:

Andrass Samuelsen, sambandsflokkurin	1948-1950
Kristian Djurhuus, sambandsflokkurin	1950-1959
Peter Mohr Dam, javnaðarflokkurin	1959-1963
Hákun Djurhuus, fólkaflokkurin	1963-1967
Peter Mohr Dam, javnaðarflokkurin	1967-1968
Kristian Djurhuus, sambandsflokkurin	1968-1970
Atli P. Dam, javnaðarflokkurin	1970-1981
Pauli Ellefsen, sambandsflokkurin	1981-1985
Atli P. Dam, javnaðarflokkurin	1985-1989
Jógvan Sundstein, fólkaflokkurin	1989-1991
Atli P. Dam, javnaðarflokkurin	1991-1993
Marita Petersen, javnaðarflokkurin	1993-1994
Edmund Joensen, sambandsflokkurin	1994-1998
Anfinn Kallsberg, fólkaflokkurin	1998-2004
Jóannes Eidesgaard, javnaðarflokkurin	2004-2008
Kaj Leo Johannesen, sambandsflokkurin	2008-2015
Aksel V. Johannesen, javnaðarflokkurin	2015-2019
Bárður á Steig Nielsen	2019 - 2022